SL(5)366 - Rheoliadau Bwyd (Diwygiadau Amrywiol) (Cymru) (Ymadael â’r UE) (Rhif 2) 2019
Cefndir a Diben
Gwneir y Rheoliadau drafft hyn o dan baragraff 1(1) o Atodlen 2 a pharagraff 21(b) o Atodlen 7 i Ddeddf yr Undeb Ewropeaidd (Ymadael) 2018 (Deddf 2018). Maent yn ceisio mynd i'r afael â methiannau cyfraith yr UE a ddargedwir i weithredu'n effeithiol, a diffygion eraill, sy'n deillio o ymadawiad y Deyrnas Unedig â'r Undeb Ewropeaidd.
Mae'r Rheoliadau drafft hyn yn diwygio naw darn o is-ddeddfwriaeth ym maes bwyd ac amaethyddiaeth:
• Rheoliadau Bwyd Cyffredinol 2004
• Rheoliadau Hylendid Bwyd (Cymru) 2006
• Rheoliadau Cynhyrchion Pysgodfeydd (Taliadau Rheolaethau Swyddogol) (Cymru) 2007
• Rheoliadau Rheolaethau Swyddogol ar Fwyd Anifeiliaid a Bwyd (Cymru) 2009
• Rheoliadau Deunyddiau ac Eitemau mewn Cysylltiad â Bwyd (Cymru) 2012
• Rheoliadau Ychwanegion, Cyflasynnau, Ensymau a Thoddyddion Echdynnu Bwyd (Cymru) 2013
• Rheoliadau Dŵr Mwynol Naturiol, Dŵr Ffynnon a Dŵr Yfed wedi’i Botelu (Cymru) 2015
• Rheoliadau Bwyd Anifeiliaid (Cyfansoddiad, Marchnata a Defnydd) (Cymru) 2016
• Rheoliadau Bwydydd Newydd (Cymru) 2017.
Mae'r rhan fwyaf o'r darpariaethau yn gwneud mân newidiadau technegol i sicrhau y bydd rheoliadau Cymru, sy'n darparu ar gyfer gweithredu cyfraith yr UE a ddargedwir sy'n ymwneud â hylendid a diogelwch bwyd a bwyd anifeiliaid, safonau cyfansoddiadol bwyd a labelu a chynhyrchion bwyd a bwyd anifeiliaid a reoleiddir, yn parhau i gael eu gweithredu ac y gellir eu gorfodi yng Nghymru ar ôl i'r DU adael yr UE.
Fodd bynnag, mae'r diwygiadau i Reoliadau Dŵr Mwynol Naturiol, Dŵr Ffynnon a Dŵr Yfed wedi’i Botelu (Cymru) 2015 hefyd yn darparu, o'r diwrnod gadael, bod yn rhaid i ddŵr o'r UE/AEE, fel dŵr o drydydd gwledydd eraill, gael eu cydnabod fel dŵr mwynol yng Nghymru/y DU cyn eu gosod ar y farchnad yng Nghymru. Mae hyn yn amodol ar ddarpariaeth drosiannol sy'n parhau mewn grym y gydnabyddiaeth bresennol yng Nghymru o ddŵr mwynol naturiol a gydnabyddir cyn diwrnod ymadael â'r UE/AEE hyd nes y bydd Gweinidogion Cymru yn cyhoeddi hysbysiad y bydd cydnabyddiaeth o'r fath yn dod i ben.
Gweithdrefn
Cadarnhaol.
Craffu ar faterion technegol
Ni nodir unrhyw bwyntiau i gyflwyno adroddiad arnynt o dan Reol Sefydlog 21.2 mewn perthynas â'r offeryn hwn.
Rhinweddau: craffu
Nodwyd y pwynt a ganlyn i gyflwyno adroddiad arno o dan Reol Sefydlog 21.3(ii), sef ei fod o bwysigrwydd gwleidyddol neu gyfreithiol neu ei fod yn codi materion polisi cyhoeddus sy'n debyg o fod o ddiddordeb i'r Cynulliad.
•
Mae Cynghorwyr
Cyfreithiol yn croesawu eglurder a manylion y Memorandwm Esboniadol
a faint y mae hynny'n helpu'r Pwyllgor i graffu'n effeithiol.
Goblygiadau sy’n deillio o adael yr Undeb Ewropeaidd
Bydd yr is-ddeddfwriaeth a ddiwygir gan y Rheoliadau drafft
hyn yn golygu “cyfraith yr UE a ddargedwir” at
ddibenion Deddf yr Undeb Ewropeaidd (Ymadael) 2018. Gall hynny fod
â goblygiadau ar gyfer cymhwysedd y Cynulliad, gan y gellid
atal y Cynulliad rhag addasu cyfraith yr UE a ddargedwir, drwy
reoliadau Llywodraeth y DU o dan adran 12 o Ddeddf 2018 (a elwir yn
rheoliadau "rhewi" yn aml).
Fodd bynnag, ni ellir "rhewi" y rhan fwyaf o'r ddarpariaeth o
sylwedd a wneir gan y Rheoliadau drafft hyn fel eu bod y tu allan i
gymhwysedd y Cynulliad, gan y gallai'r Cynulliad fod wedi gwneud y
ddarpariaeth gyfatebol o dan gyfraith yr UE cyn Brexit. Un eithriad
fyddai'r darpariaethau yn rheoliad 8, sy'n darparu mecanwaith i
Weinidogion Cymru roi'r gorau i gydnabod dŵr mwynol naturiol a
gafodd gydnabyddiaeth mewn Gwladwriaethau eraill yn yr UE/AEE cyn y
diwrnod ymadael. Ni allai'r Cynulliad fod wedi terfynu
cydnabyddiaeth o'r fath cyn Brexit, gan y byddai gwneud hynny yn
mynd i groes i gyfraith yr UE. Fodd bynnag, gallai adfer y
gydnabyddiaeth honno yn y dyfodol, gan y byddai gwneud hynny yn
gydnaws â chyfraith yr UE cyn Brexit - hyd yn oed pe bai
Llywodraeth y DU yn gwneud rheoliadau rhewi i'r perwyl hwnnw.
Ymateb y Llywodraeth
Nid oes angen ymateb y llywodraeth.
Cynghorwyr Cyfreithiol
Y Pwyllgor Materion Cyfansoddiadol a Deddfwriaethol
6 Mawrth 2019